Nagrittuok pay ti panga ni Damian iti kadakkel ti suyaabna. Alas kuatro iti parbangon itay rugianna ti aguray iti puon ti akasia iti nasipnget a paset ti Sitio Simriam. No kasano ti kairut ti panangpetpet ti kanawanna iti nakakasan a kalibre kuarentay singkona, kasta met ti kaiget ti panangsiputna iti namnamaenna a pagsungadan ni SPO1 Telesforo Ancheta.
Alas kuatro kinsen.
“Awan met laengen ti diables,” inngarietna.
Inwarasna ti panagkitana. Ti laeng pisi a bulan ti mangmangted iti lawag iti akikid a dalan. Agarup maysa a kilometro ti kaadayo ti kaasitgan a balay isu a kasla nakadisso a kulalanti dagiti nakasilawen a pagtaengan.
“Kasla abut ti kinasipnget ditoy pagdiagdiagigan ti salbag,” indayamudomna.
Makalawas nga inadalna ti garaw ni SPO1 Ancheta. Naammuanna a saan a malibtawan ti polis ti agdiaging iti parbangon ditoy.
“Daytoyen ti maudi a diagingmo, SPO1 Tele,” inngarietna. “Uray telekinesis, saanna a malapdan dagiti buli a sumrek iti ulom!”
Aw-awaganda iti SPO1 Tele ni Ancheta ta atapenda a kabaelanna ti mangiwayat iti telekinesis— ti panangkontrol kadagiti nadumaduma a bambanag babaen ti panunot.
Di akuen ni SPO1 Ancheta daytoy ngem adu ti mangibagbaga a saksida iti panagusarna ti telekinesis kadagiti operasionda kontra iti droga, kas iti panangbangenna iti lugan ti kabsat ni Damian a naggandat nga aglibas iti inwayatda a raid. Pinagtapawna kano dagiti nakapaigid a kurongkurong, traffic sign ken pagbasuraan. Nagtupak dagitoy iti sango ti lugan ti kabsat ni Damian.
Nakabalud ita ti kabsat ni Damian isu a kayat ni Damian a patayen ti polis.
Sinukisokna no kasano a mapadso ti addaan iti telekinetic power. Naduktalanna a no makellaat, saanna a dagus a mausar ti bilegna.
Nakangngeg iti danapeg. Agarup dua gasut a metro manipud iti paglemlemmenganna, nakitana a sumungaden ni SPO1 Tele. Nagsagana.
Idi maysa a deppa laengen ti nagbaetanda, kellaat a nagparang ken impaturongna ti paltogna iti polis. Nagminar iti rupa ti polis ti pannakakigtotna.
“Kanibusanamon, SPO1 Tele!” imbuelona ti mangkalbit iti paltogna.
Ngem naklaat. Saanna a magaraw ti ramayna! Kasla adda mangigawgawid!
Pagam-ammuan, timmayok ti paltogna sa naguyod dagiti ima ken sakana. Uray ti ulona, saanna a magaraw, isu a dina maliklikan ti perreng ni SPO1 Ancheta.
“K-kasano a naipakatmo ti telekinesis… ket kinellaatka met?” inkarigatan ni Damian a kinuna.
Nagkatawa ti polis. “Mamatpatika unay iti tsismis, Damian! Awan kabaelak iti telekinesis. Maysaak laeng a gagangay a polis… Ngem adda gagayyemko nga addaan kadagiti naisangsangayan a bileg.”
“G-gagayyem?”
“Ubingak pay, agpapagayamkamin. Ditoy ti pagtaenganda. Saanda nga ipalubos nga adda dakes a mapasamak kaniak. Kitaem ida. Makagurada kenka gapu iti pananggandatmo a mangpapatay kaniak.”
Kasla adda nangruk-at iti ulo ni Damian. Inwarasna ti panagkitana.
Babassit a parsua. Dua ti mangigawgawid kadagiti luppona. Dua met ti nakatapaw a mangun-unnat kadagiti imana. Nasurok a duapulo dagiti nakapalikawkaw kadakuada. Kaaduan ti nagbarbas ken bimmato dagiti bagbagida. Aminda, bumegbeggang dagiti matada.
Napalua ni Damian iti butengna. “Kaibaan! Kaibaan!”
Limgaken ti init idi makita ti maysa a grupo dagiti agdiagdiaging ni Damian. Agulang-ulang ken agpukpukkaw iti sirok ti maysa a kayo. Pigispigis dagiti pagan-anayna ken adu dagiti sugat iti nadumaduma a paset ti bagina. Patien dagiti makaam-ammo kenkuana a nadadaelen ti panunotna gapu iti droga nga ilaklako met laeng ti kabsatna.
- Jorge Guerrero
(Artwork courtesy of Bannawag Magazine)
No comments:
Post a Comment